غربة فرج-الحلقة الثانية : قدّيش بدهم يعطوك ؟؟؟؟.؟؟؟؟

"راحت السكرة ....وجاءت الفكرة " ليس أمام فرج سوى أيام معدودات على سفره , ويله يودع معارفه .. ويله  يجهز نفسه للسفر من جواز سفر لفحص طبي والأهم مصروف جيب يكفيه لشهرين في الخليج , لأن السفارة أبلغت المتعاقدين الجدد بأن صرف رواتبهم بعد شهرين من الوصول , ومن ثم تعطيهم مستحقاتهم بأثر رجعي , وهذا الشرط معضلة بحد ذاته, خصوصا أنه لا يمتلك من حطام الدنيا سوي مبلغ رمزي على كم لبسه مهترئة عفا عليها الزمان .

طبعا التراجيديا عند فرج تنتهي بلحظتها وما بعيش الدور ويعملها فيلم هندي , رامي حمله دايما على اللي خلقه , مسّلح حاله بكم بيت من الشعر حافظهم عن ظهر قلب مثل "ضاقت فلما استحكمت حلقاتها..... فرجت وكنت اظنها لا تفرج" , وكلمة كيف؟ أو ليش؟ حاذفها من قاموسه, خفة دم مش طبيعية , وجهه مصعق أحيانا مع شوية كلاحة إن لزم الأمر. هذا هو فرج إذا تحطوا بالخلاط بتطلع معكم شخصية تزيح الهم عن القلب . فكر فرج مين ممكن يداينه 500 نيرة ؟ وما يكسفوا؟؟؟. طبعا ما في غير المعلم .. نشمي و جدع .. عيبه ما بتخلص من لسانه وبحملك مليون جميله بس قلبه زي البفته البيضة , وطيران على الورشة مع دخلة المعلم , كم بوسة على شوية تعبط مع إلحاح شديد بالسؤال على قدّيش بدهم يعطوك؟؟؟؟ ......هروب مع مراوغة , حتى حصّل فرج على ما يريد و التشديد كل خمس دقائق على تسديد الدين بعد أربع أشهر, وتوصية دير بالك يا فرج مش تغيب وتغيب وتهللي بالدشاديش المبلطة زي اللي بجيوبها من الحج والعمرة , صارت كل الحارة بتلبسها , بتشوفهم كل يوم صبح , لابسينها حتى يجيبوا صحن الفول والحمص. وأيام الجمع للصلاة لابسينها مثل زي المدارس الموحد . إذا.. ولا... بد , و تجيب , بركة منك كم قنينة عطر "لابيدوس" أو "ون مان شو" يكونوا أصلي مش تقليد زي عطور الشام وإذا بدّك تتفضل علينا أكثر ! كروز  "مالبورو" أحمر.. أنت كريم وإحنا نستاهل . وفرج ما في على لسانه غير "ما بصير خاطرك إلا طيب " , "ول يا معلمي أنت بتأمر أمر", على راسي" , "على شواربي" وانتهى اللقاء كما بدء بالمباوسة والتعبيط ومعلمه لا زال يسأله "ولك يا أزعر ما بدّكش تحكيلي قدّيش بدهم يعطوك ؟؟؟؟" ... وإكوي يا فرج خلّص حالك وجمّع أصحابك في قهوة "الشابزوغ" أراجيل و شدّة وضحك على نهفات فرج أيام الدراسة وحسرة على فراقه بسبب الوضع المادي الذي أدى إلى هروب الخبرات والعقول!!! للخارج مثل صاحبهم اللحيم فرج . بالتوازي مع تقديم دستة شهادات خبرة إن لم تكن لهم , فلإخوانهم , معظمها لخريجون جدد , لا تحتوي غير صورة صاحب الطلب بخلفية حمراء , ويظهر أكبر بعشر سنين فلا تميز عمره الحقيقي هل من رداءة الصورة أم أن الهم راكبه , أما بالنسبة للخبرات والمشاريع لا يوجد عنده سوى أيام الدراسة وإن وجد تكون خبرة تقل عن سنين في شركة أو مؤسسة غير معروفه , طبعا الحالة الاجتماعية أعزب , وعنوان الاتصال ميني ماركت :0000 أو سوبر ماركت :.0000 . وكل واحد منهم يوصّيه "دير بالك يا فرج مش تغيب وتنسانا , ما في واحد مجمّع الشلّة غيرك , والله يستر ما تفرط . وظلك اقرى جرايد وأي وظيفة بتلبق على واحد منّا بتقدم له طلب وبتحط عنوانك هناك , ولما يصير نصيب تحكي معنا دوغري بتلاقينا عندك , وتنساش تسلم لنا على الوزاويز " بالإضافة لتوصيات مثل المعلم . وفرج ما في على لسانه غير "ما بصير خاطركم إلا طيب " , " بتأمرو أمر" ,"ول يا شباب" ,"على راسي" , "على شواربي" وانتهى اللقاء كما بدء بالمباوسة والتعبيط وما في على لسانهم "ولك يا أزعر ما بدّكش تحكي لنا قدّيش بدهم يعطوك ؟؟؟؟.؟؟؟؟"... وإكوي يا فرج خلّص حالك على نص البلد عند محلات البالة بدلة صوف كاروهات خطوط عريضة موضة التسعينات والثانية سفاري بني غامق موضة "سمير غانم", مع كم بلوزة "لاكوست" بكيسها ودرزن بلاطين قماش على جينز من عند "حواتمة" والأهم كندرة "توب سايدر" من عند" باتا" .والأيام تجري وعلى هذا المنوال ودع أقاربه ,اصحابه وزملاؤه وأنهى أعماله ومشاغله حتى أنقضت الأيام ولم يبقى عليه شيء إلا مطعم "هاشم" وكنافة "حبيبه" , آثرهما للآخر مع صديق الطفولة "كايد :عريس الحلقة الاولى" وصاحب الجمايل يكفي أنه سيوصله للمطار بسيارة أبوه " المرسيدس" اللف . وبالفعل بدء بـ" هاشم" , واثناء ما كان فرج بلحوس صحن الحمص من جهة , بقرش بالفلافل من جهة , ورائحة البصل من جهة ويشف بكاسة الشاي من جهة ويمسح ايديه تحت الطاولة من جهة, ثم يتوقف والطعام بحنكه , مع طرطشة شوية تفالة على وجه كايد ..ويتابع جملة متقطّعة... "شايف علي يا خوي يا كايد" , مع صمت ليبلع اللقمة , ويعيد الدور مرة تلوه المرة وينهيها "شايف علي يا خوي يا كايد" , حتى خرج كايد عن طوره , "ولك يا فرج فقعت مرارتي يا زلمة عبيت وجهي ابزاقة.. لا أنت بتوكل مثل الخلق والبشر ..ولا مخليني عارف آكل.. هسع دشرنا من دواوينك الفاظية بدكش تحكيلي قديش بدهم يعطوك ؟؟؟؟"... وإكوي يا فرج خلّص حالك على "حبيبة" وعند الدخلة أوقية ورى أوقية مع القطر , وينفخ من حرارة الكنافة ويتابع "شايف علي يا خوي يا كايد" , مع صمت ليبلع اللقمة , ويعيد الدور مرة تلوه المرة وينهيها "شايف علي يا خوي يا كايد"... وين كايد ؟؟ واكوي يا كايد , شغّل سيارتك واحلف "والله ما تروح معي اليوم روح بالسرفيس والباصات و من بكرة الصبح بوصلك المطار" , فرج!!! .."كايد تعال يا كايد ..يهديك يرضيك بدهم يعطوني......ولك يا كايد"....عريس جديد الله يلوم اللي بلومه .

خلاااااااااص .........................

روّح يا فرج .. واربط باب الدار ..ارمي راسك في حضن الحجة , "يمّه...... , مش عارف كيف بدّي أتركك وأترك أبوي و,اخواني وأصحابي وبلدي" , طبعا الحجة بتفلي بشعر فرج المجعد وعينيها تقطر بالدمعات والعبرة تخنقها تنهيده ورى تنهيده .."يمّه هاي حال الدنيا تبدء باثنين وتنتهي باثنين , واللي ربنا كاتبه بصير , بظلك هون وإلا بتسافر , يقصر عمرك وإلا يعمر....هاظا كله بعلم الغيب .. الله يمدك رزق مدد ما هو عدد كما مد الزيت بالزيتون والمي بالليمون ويبعد عنك ولاد الحرام وبنات الحرام ", هيييييييه ...

} وما تدري نفس ماذا تكسب غدا وما تدري نفس بأي أرض تموت {صدق الله العظيم.

وفرج.." يمّه أنا كلي إلك بس أدللي شو توصيني"  ,  "يمّه.. دير بالك يا فرج مش تغيب وتغيب وتنسى إخوتك , بدّي أيدكم على أيدين بعظ , وما تقطع ولاياك, لأنه الرحمة والود موصولة بعرش الرحمن ولا تخلي أبوك يغظب عليك , لأنه رضىالرب من رضىالأب , وتصير تصلي وتصوم مثل الخلق والبشر , وتحرص على صحتك وفلوسك لأنهم إذا راحوا ما يرجعوا". وفرج ما في على لسانه غير "ما بصير خاطرك إلا طيب " , "ول يا يمّه" , انتي بتأمري أمر", على راسي" , "على شواربي" , مع دخلة الحج , كويس اللي صدناك يا هلس , وفرج أنت بتأمرني أمر يا حج..."أنا كلي إلك" , والحج ولك بظلّك هلس حافظ كل دواوينك , .."ما بصير خاطرك إلا طيب.. ول يابا .. انت بتأمر أمر.. على راسي.. على شواربي.. ولك اسناني تقلعوا من الزعرنة ..هسع الحقني على السطح بدّي أحكي معاك حكي زلام" , "يا ساتر شو بدو الحج ؟؟  !!".."اقلط  جنبي على الفرشة جاي" , "خير يا حج".. , "كل خير يابا , دير بالك يا فرج مش تغيب وتغيب وترجعي لي منفظ جيوبك على سوالفك سيارات ولبس , بدّي تحول لي 200 نيرة شهري , بدّنا الصيف الجاي نزوج أخوك الكبير عوظ على بنت عمك أبو الأنيس , قارين الفاتحة عليهم وهم باللفة , وهيّك شايف أخوك عوظ خلص رياظيات ودروش وربالي لحيته ما بدّو يدّرس خصوصي مثل ابن أبو جمال اللي صار عندوا عقب قدو , بظلّو يقول لي حرام , وعلى هاظا الحال بدو سنين ي الله يتجوّز , برظاي عليك خليني أفرح لي بحفيد منكم ". . "طولة العمر إلك يا حج وتشوف ولاد ولادنا ....ما بصير خاطرك إلا طيب" .. "دير بالك يا فرج مش تغيب وتغيب وترجع لي متزوج أجنبية شقرة لابسة قصير محزك وملزك وابنك وإلا بنتك على إيدك , زي ولاد خالك". ." يابا..... هو أنت شايفني رايح روسيا... ...أنا رايح على الخليج ..... ثم..بالله عليك هاي سحنة واحد بيطلّعوا عليها ....شايفني "رشدي أباظة!!!!!! بوعدك يا حج ما تسمع إلا الأخبار الطيبة , وأي مصاري بتنقص عليك بس تلفن لي"...الحج تنهيده...وراء ... تنهيده...... "صحيح ..يا فرج , على سيرة المصاري قدّيش بدهم يعطوك ؟؟؟؟"... وإكوي يا فرج خلّص حالك على أرض المطار .

إلى اللقاء في الحلقة القادمة من مسلسل "غربة فرج"

المؤلف : عبدالرحيم محمد الحــــــــــافي

"مدونة الحــــــــــــــــافي" Created by A.Raheim Mohamed Alhafi is licensed under a Creative Commons Attribution 3.0 United States License. Based on a work at www.alhafi.spaces.live.com/blog. Permissions beyond the scope of this license may be